(បរទេស)៖ សេវាអ៊ីនធឺណិតផ្កាយរណប Starlink របស់ក្រុមហ៊ុន SpaceX ដែលគ្រប់គ្រងដោយមហាសេដ្ឋី Elon Musk បានចាប់ផ្តើមទទួលការកុម្ម៉ង់ជាផ្លូវការនៅក្នុងប្រទេសវៀតណាមហើយ។ ការចាប់ផ្តើមនេះ បានធ្វើឱ្យប្រទេសវៀតណាមក្លាយជាទីផ្សារទី៦ នៅក្នុងតំបន់អាស៊ីអាគ្នេយ៍ ដែលទទួលបានសេវាកម្មអ៊ីនធឺណិតផ្កាយរណបនេះ បន្ទាប់ពីប្រទេសឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី និងទីម័រខាងកើត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៣ ខែសីហា ឆ្នាំ២០២៦។
ប្រជាពលរដ្ឋវៀតណាមអាចធ្វើការកក់ប្រាក់មុនតាមរយៈគេហទំព័រ starlink.com.vn សម្រាប់កញ្ចប់សេវាកម្មប្រើប្រាស់តាមផ្ទះ ក្នុងតម្លៃចាប់ពី ១.១៣ លានដុង (ប្រហែល ៤៣ ដុល្លារ) ក្នុងមួយខែ រួមជាមួយថ្លៃទិញឧបករណ៍បំពាក់ដំបូង (hardware) ចំនួន ៨.៦៦ លានដុង (ប្រហែល ៣៣០ ដុល្លារ)។ សេវាកម្មនេះ ត្រូវបានប្រតិបត្តិការដោយក្រុមហ៊ុនបុត្រសម្ព័ន្ធក្នុងស្រុក Starlink Services Vietnam ដែលបង្កើតឡើងក្នុងខែកញ្ញា ឆ្នាំ២០២៥ ជាមួយដើមទុនចុះបញ្ជីចំនួន ៣០ ពាន់លានដុង (ប្រហែល ១.១ លានដុល្លារ) ព្រមទាំងមានស្ថានីយដីគោក (Ground gateway stations) ចំនួន ៤ កន្លែងដែលទទួលបានការអនុញ្ញាតពីរដ្ឋាភិបាល។
គួរជម្រាបថា ការដាក់ឱ្យដំណើរការនេះ ធ្វើឡើងបន្ទាប់ពីរដ្ឋាភិបាលវៀតណាមបានប្រកាសកាលពីខែមីនា ឆ្នាំ២០២៥ ដោយអនុញ្ញាតឱ្យ SpaceX ដំណើរការសេវា Starlink ជាលក្ខណៈសាកល្បង និងបានលើកលែងដែនកំណត់លើការកាន់កាប់ភាគហ៊ុនបរទេសថែមទៀតផង។ ទោះជាយ៉ាងណា អាជ្ញាធរវៀតណាមបានកំណត់ចំនួនអ្នកប្រើប្រាស់អតិបរមាចំនួន ៦០០,០០០ នាក់ប៉ុណ្ណោះ ក្នុងអំឡុងពេលសាកល្បងនេះ ដែលនឹងត្រូវអនុវត្តរហូតដល់ចុងឆ្នាំ២០៣០៕
No comments:
Post a Comment